Alqaly otyrysqa áleýmettaný ǵylymdarynyń doktory Aıgúl Sádýaqasova, Germanııadan kelgen Shyǵyseýropalyq jáne halyqaralyq zetteýler ortalyǵynyń ǵylymı qyzmetkeri, doktor Beate Eshment, «Dinderdi zertteý ortalyqtary» qaýymdastyǵynyń sarapshysy Sherzod Pýlatov, «Qyrǵyzstan-Astana» qyrǵyz etnomádenı birlestiginiń tóraǵasy Shavkat Ismaıylov, Qazaqstan Respýblıkasy Prezıdenti janyndaǵy Qazaqstan strategııalyq zertteýler ınstıtýty áleýmettik-saıası zertteýler bóliminiń basshysy Alýa Joldybalına qatysty.
Basqosý Qazaqstan halqy Assambleıasynyń HHVI sessııasy aıasynda uıymdastyryldy.Jıyn basynda sóz alǵan Aıgúl Sádýaqasova sheteldik ǵalymdardyń Qazaqstan jaıly pikirine basa nazar aýdardy. Onyń aıtýynsha, sheteldikter negizinen egemendiktiń alǵashqy jyldary men qazirgi kezdegi jaǵdaıdy salystyryp baryp oı qorytatynyn tilge tıek etti.
– Sheteldik ǵalymdar suhbattarynda, maqalalarynda Qazaqstan týraly jyly lebizderin jıi bildirip jatady. Olar elimizdiń jetistikterin Memleket basshysynyń «Qazaqstan – bárimizge ortaq úı» degen tujyrymdamasynyń nátıjesi dep túsinedi. Bul syrt kózdiń, syrtqy sarapshylardyń pikiri. Al syrt kózden aıtylǵan mundaı oı elimizdiń saıasatyna, turaqtylyǵyna berilgen jaqsy baǵa, – dedi Aıgúl Sádýaqasova.
Germanııadan arnaıy kelgen Beate Eshment Ortalyq Azııa elderiniń demokratııalaný úrdisi men ulttyq saıasatyn zertteıdi. Budan bólek, Qazaqstandaǵy biregeıliktiń qalyptasýyna, sany az etnos ókilderiniń múddelerine qatysty máselelerdi zerdeleıdi.
– Qazaqstandaǵy ulttyq saıasat, sondaı-aq ulttar azshylyǵynyń problemalaryn zerttegenime jıyrma jyldan astam ýaqyt ótti. Qazir men Qazaqstannyń etnosaralyq qarym-qatynasy máselesindegi ádisteri óte tıimdi degen oıǵa keldim. Mundaǵy etnostar arasynda «shańyraǵymyz ortaq, úıimiz bir» degen uǵym qalyptasqan. Mine osy uǵymnyń arqasynda iske asyrylyp jatqan is-sharalar turaqtylyqty qamtamasyz etedi, – dedi Beate Eshment.
Is-shara barysynda elimizdegi turaqtylyq pen birlikti nyǵaıtý jáne damytý jaıy talqylandy.
Aıan ÁBDÝÁLI,
«Egemen Qazaqstan»
